وقائع جلسة محاكمة خيالية مسرحية هزلية من فصل .. بارد !١

وقائع جلسة محاكمة خيالية مسرحية هزلية من فصل .. بارد !١

كُتب في: 10 أغسطس 2014 , ( 54 : 10 ) | عدد تعليقات 5

هذه المحاكمة هي خيال محض وأي تشابه بينها وبين الواقع هو محض تشابه لا علاقة له بالحقيقة البتة !!

المتهم : اللي حصل دة كان مؤامرة مش ثورة
كاتب الجلسة مذهولا ومرددا نظره بين القاضي و المتهم : مؤامرة ازاي؟!! ده في الدستور قايلين إنها ثورة والرئيس في كل مناسبة وخطاب بيقول عليها ثورة ،إنت شفت الأعداد الـ..
المتهم مقاطعا بحدة : إنت كنت في المظاهرات ياااض؟!
كاتب الجلسة مذعورا: لا ياباشا أنا كنت معدي بالصدفة !
المتهم : يبقى ما تعرفش حاجة وتكتب اللي بقولك عليه ، وآهو موضوع الأعداد ده بالذات اللي بيأكد ، الأعداد لعلمك أقل بكتير من اللي طلعت في الفيديو ، وعلى رأي الإخوان الأعداد دي فوتوشوب!
القاضي : ما شاء الله بتستشهد بالإخوان؟! .. بس الإخوان بيتكلموا عن 30\6 ؟!
المتهم : وأنا بتكلم عن يناير وكل الناس عارفه إننا ما قتلناش حد وإنها مؤامرة واللي نفذتها حماس وفتحت السجون وقتلت المتظاهرين ،واحنا عندنا تسجيلات صوت وصورة
كاتب الجلسة : حماس مين اللي قتلت المتظاهرين ؟! ده أنا شايف بعيني ظباط الشرطة وهم بـ..
المتهم: أنا شاكك فيك ياض! إنت كنت ف المظاهرات !
النيابة : أرجو من عدالة المحكمة إثبات إعتراف المتهم بالتجسس ع..
المتهم مقاطعا : تجسس؟!! إخرس ..احنا بنقوم بدورنا في حماية الشعب
القاضي : فهمني بس ايه حكاية التسجيلات دي.. وصوت وصورة كمان .. طب ازاي حاطين كاميرات في كل حتة؟!
المتهم: لأ طبعا ! أفهم سعادتك ..احنا عندنا أجهزة بتسجل لأي واحد معاه تليفون بكاميرا ، بتشغل الكاميرا بتاعته تسجل صورته والميكرفون يسجل صوته، يعني عارف كده زي لامؤاخذه في الآخرة لما أعضاءك تعترف عليك ؟!، واحنا لامؤاخذه شعبنا جاهل ما بيعرفش يستخدم التكنولوجيا فبتعترف عليه ، يعني مثلا ..مثلا واحدة مواطنة حلوة وصغيرة داخله تستحمى ت..
النيابة مقاطعا: آهو يا فندم ..أرجو من عدالة المحكمة إثبات ..
القاضي : استنى يا بني بس أما نفهم .. ايوة يا أستاذ داخلة تستحمى وبعدين ؟!
المتهم: ولا بتعمل ببي تاخد الموبايل معاها الحمام ليه؟!
القاضي : بتسجلوا لها ؟!!
المتهم: طبعا ، أمال فاكرينا نايمين على ودانا ، احنا بنسجل ببي النملة !
النيابة : أمال ما سجلتوش ليه لحماس وهي داخلة من الأنفاق و..
المتهم : مين الحمار اللي قالك كده ؟!، لعلمك بقى احنا مسجلين لحماس وهم في بيوتهم من قبل ما يوصلوا الأنفاق! ومتابعينهم من غزة لحد وادي النطرون رايح راجع ، ومش احنا بس وعمر سليمان وكل الأجهزة السيادية كانت متبعاهم ومسجلة لهم !
القاضي ناهرا النيابة : يا ابني ما تطلعش كده زي البارودة المحمصة وخلينا نفهم الأول! .. ثم للمتهم برقة: كمل يا أستاذ ..
المتهم بخبث : حماس ولا اللي بتستحمى ؟!
القاضي متجاهلا خبثه : أيوة يعني والتسجيلات دي بتتعرض فين ولا بتشوفوها ازاي ؟!
المتهم: هو سيادتك ما شفتش الروب البمبي اللي في مكتبي؟! أصل أنا الصراحة يعني هاعترف لك آهو ما بحبش أفلام السيكو سيكو كلها صناعية كده ونفخ ، الطبيعي يكسب طبعا ، أنا بقى عندي في المكتب شاشة كبيرة 60 بوصة وبيجهزوا لي كل خميس أزازة ال .. آآآآ ..بيبسي .. وتسجيلات المزز اللي بتشوفهم في التلفزيون الراقصين ع الممثلات ، بس مش هتصدق نص اللي بتشوفهم مشدودين وع السنجة دول أول بس ما تقلع تلاقي اللي بيقع واللي مرهرط واللي بكرش ، نادر اللي بتفضل مشدودة كده وعود زي البت الراقصة دي .. اللي اسمها ..آه صافيناز ..يا ستاااار
القاضي : أمال التسجيلات دي مش في الأحراز ليه ايه الفوضى دي؟!!
النيابة مقاطعا: أرجو من عدالة المحكمة إثبات أن المتهم يستغل أجهزة الدولة وإمكاناتها للاطلاع على عورات الموطنين والتجسس عليهم بدلا من القيام بواجبه وحمايتهم من المنظمات الإرهابية التي اكتفوا بمراقبتها
المتهم : واحميهم لييييه؟! ما يستهالوش! مش دايرين يهتفوا ” ..أم .. بتاعكو” .. يشربوا بقى.. ” اللهم اضرب الظالمين بالظالمين
النيابة مقاطعا: إثبت يا سيادة القاضي آهو المتهم اعترف باشتراكه وكل الأجهزة السيادية بالتآمر على الشعب وتركه للتنظيمات الإرهابية تعربد وتعيث في الوطن فسادا
المتهم للقاضي : وبعدين بقى .. الجدع ده مش هيجيبها البر أنا صابر عليه بس عشان خاطرك
القاضي : هو ما يقصدكش إنت يا أخي ، ده قصده على عمر سليمان الله يرحمه ..ويديله الصحة ..ثم موجها حديثه للنيابة حاضر ..حاضر يا أستاذ هنثبت لك كل اللي انت عايزه ، بس اهدى كده وخلينا نشوف شغلنا
كاتب الجلسة هامسا للقاضي : أسجل اللي النيابة قالته ؟!
القاضي : تسجل ايه ..سيبك منه .. إنت كتبت لحد فين ؟!
كاتب الجلسة: مش عارف أكتب هي ثورة ولا مؤامرة ؟!
القاضي : سجل يا سيدي اكتب.. ثورة .. أتلفها الهوى !!

Advertisements
This entry was posted in Uncategorized. Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s