الشعب المصري حين يثور ويبدع.. هتافات ..وكوميديا ..!!١

هي محاولة لتسجيل الثورة و أحداثها المتلاحقة  ـ قبل أن ننساها ـ من زاوية مختلفة ، وللتمعن في عبقرية وتميز هذا الشعب الذي إستخدم خفة دمه كسلاح فتاك سريع الطلقات في المعركة ـ إحدي النكات أن مبارك تنحى فقط لأنه لم يحتمل سيل النكت والتريقة في ميدان التحرير ـ وكما تحول الإعتصام في الميدان إلي شئ أشبه بالكرنفال في الأيام الأخيرة للثورة ، كانت النكتة والهتاف السياسي والساخر أحيانا ، الرد السريع علي كل مناورات النظام ومحاولاته للإلتفاف علي الثورة ، بشكل كان يصل إلي حد الإهانة،  ردا علي عدم إحترام النظام لذكاء المصريين وسذاجة بعض هذه المحاولات  ..  وأرجو لمن يملك ما فاتني من هتافات وكوميديا أن يمدني بها ، فتسجيل هذه الثورة التاريخية من كل جوانبها حق ندين به للأجيال القادمة ..

الشعب يريد إسقاط النظام

الهتاف الأثير عندي لأنه وحد الثوار جميعا علي إختلاف إتجهاتهم السياسية ، أو أسبابهم للثورة ، هو الشعب يريد إسقاط النظام ، وحد الثوار جميعا حول مطلب واحد وهدف واحد ، ولخص بباسطة ووضوح أسباب المعاناة وطريقة حل كل المشاكل دون الدخول في نظريات وتحليلات وتفصيلات  تفرق الثوار ولا يحتملها الموقف ، ثم تحور بعبقرية للرد علي محاولات الإلتفاف علي الثورة ، حين خطب مبارك للمرة الأولي متصورا أن بإلقائه بعض فتات المطالب للثوار ، مثل حل الحكومة وتشكيل حكومة جديدة ، أو حتي تعيين نائب للرئيس أنه يستطيع تفريق المتظاهرين والوقيعة بينهم واللعب علي إختلافاتهم ، فكان الرد أن تحور حينها إلي الشعب يريد إسقاط الرئيس، ليصوب الشعب سهمه بتركيز رائع علي هدفه الأساسي  ، إسقاط الرئيس ، وليس بضعة إصلاحات في النظام ، ثم عاد بعد تخلي الرئيس عن بعض صلاحياته لنائبه إلي الشعب يريد إسقاط النظام ، ليضم نائب الرئيس إلي جملة المطلوب إسقاطهم ، وتحور أيضا مصعدا ومهددا إلي الشعب يريد محاكمة أو إعدام الرئيس ، كما حدث في جنازة شهيد الصحافة الصحفي بجريدة الأهرام ..المغريب والمضحك أنه رغم كل هذا الوضوح والتركيز في مطلب واحد ،لم يحد عنه الثوار من بداية الثورة في ٢٥ يناير ، المضحك أن يخرج محللي النظام وبهلواناته وللأسف بعض المحترمين أو من كنت أظنهم كذلك ، ليعلقوا بأن النظام قد حقق ٩٠ وأحيانا ٩٥ من مطالب الثوار ، فلماذا لا يعودون إلي بيوتهم ؟؟!!.. وإنتهي الهتاف بعد الرحيل إلي ” الشعب خلاص أسقط النظام “..!١

سلمية ..سلمية

هتاف يعكس فكر وتحضر الثوار ، وإصرارهم علي أن تكون ثورتهم سلمية بإصرار يدعو للإعجاب فالهتاف لم يكن يستخدم فقط عندما تبدأ جحافل الأمن المركزي في التحرك والزومان المهدد بالتدخل العنيف ، بل كانت تستخدم أيضا من المتظاهرين أنفسهم لردع من يحاول منهم الرد بالحجارة علي إعتداءات الأمن بالعصى والقنابل المسيلة للدموع ، ولكنها لم تفلح مع تصعيد الأمن إلي إستخدام الرصاص المطاطي والحي .. ويتدخل الحس الفكاهي ليستخدمها البعض بعد أحداث الأربعاء الدامي ، حين يقبضون علي أحد البلطجية أو المخبرين حيث يسحبونه لتسليمه للجيش وهم يكيلون له اللكمات ويهتفون سلمية ..سلمية ..!!١

إرحل .. إرحل

لافتات مكتوب عليها : إرحل بقي ..أنا عايز أستحمي ، أو مراتي وحشتني ، أو إيدي وجعتني رافعا اللافتة ، أو الواد وجع لي كتفي ، حاملا إبنه علي كتفه يحمل اللافتة ، إرحل يعني إمشي ياللي مابتفهمشي ، هاتمشي هاتمشي فإنجز عشان عايز أحلق ، لافتة إرحل بالهيروغليفي يمكن تفهم يا فرعون ، باي مبارك ..موبايلات بقي ، مبارك .. طير إنت ، إرحل يابارد أنا سقعت ، إرحل الولية عايزة تولد والواد مش عايز يشوفك ، لافتة في الأيام الأخيرة ..خلاص ماترحلش إحنا جايين لك القصر تهديدا بالزحف لقصر العروبة ، لو ما رحلتش هاستحمي بكرة ف قصر العروبة ، واحد إتنين هنام النهاردة فين

هتاف : الشعب والجيش أيد واحدة

هتاف بعد الرحيل : ..إرفع راسك فوووووق..إنت مصري

هتاف : لا مبارك ولا سليمان دول عملاء أمريكان

هتاف : يا مبارك ياطيار ..جبت منين ٧٠ مليار

هتاف : جيش أكتوبر حرر سينا .. والتحرير بيحرر مصر

لافتة : رابطة نجاري مصر يسألون مبارك ما نوع الغراء الذي يستخدمه

لافتة : مطلوب جراح لفصل تؤام ملتصق مبارك .. والكرسي

لافتة : مبارك يتحدى الملل

لافتة : الراجل بتاع كنتاكي أبو دقن طلع .. إخوان

لافتة : الشباب السيس .. أسقط الرئيس

هتاف : جريدة الأهرام نجاح الثورة بناء علي توجيهات السيد الرئيس

الرؤساء العرب بقوا عاملين زي ستار أكاديمي ..كل تلات بيطلعوا تلاتة نومينيه ، والجمعة الشعب يخرج واحد منهم

منك لله خليتنا نحب بعض .. لافتة يحملها مسلم ومسيحي

رجل عجوز رث الثياب يحمل طبق بلاستيك عليه ساندويتش جبنة يمشي في الميدان هاتفا:  ” حد عايز كنتاكي .. حد عايز خمسين دولار ..

راجل ماشي ف الميدان ينده : ياولاد الحلال.. ريس تايه ..أعمى مابيشوفش ..أطرش مابيسمعش ..غبي ما بيفهمش ..اللي يلاقيه فأقرب صفيحة زبالة يرميه ..أو يولع فيه

بعد خطاب الرئيس الأول الذي ألقي فيه ببعض التنازلات من وجهة نظره ، واحد في الميدان بيسأل صاحبه هو الرئيس قال إيه في الخطاب ، صاحبه قال : أنا مش خرونج أنا كينج كونج

لافتة : أنا داخل أنام ..المفتاح تحت الدواسة .. الإمضاء بن علي

لافتة بعد التنحي : إنت صدقت ولا إيه إحنا بنهزر معاك .. إمضاء الكاميرا الخفية

ياعمر سليمان انا بعت الأجندة وجيبت كشكول سلك

لافتة بعد التنحي: رسالة من ميدان التحرير للإخوة العرب : حد عنده ريس مضايقه قبل ما نروح

هتاف :الجمعة بعد العصر هنهد عليك القصر

التناحة والغباء

حد يفهم مبارك أن تنحي جاية من التنحي مش التناحة

لو إنت رخم إحنا .. أرخم

لافتة : إنت غبي تييت .. إنت حمار ولا إيه

مؤكد : مبارك يأمر كل القنوات الفضائية أن تذيع أغنية هشام عباس : هتقولي امشي مش هامشي هتجيبلي حد يقولي امشى مبمشييش !!!١

الشخص الوحيد الذي إلتزم بقرار حظر التجول في مصر هو .. الرئيس

إذا الشعب يوما أراد الحياة .. فلابد أن يستجيب البقررر..!!١

آخر طلعة جوية ..علي جدة ف السعودية

مفاجأة مدهشة : كل الأجيال راحت الجيش .. وإحنا الجيش جالنا

لافتة بعد التنحي : المعتصمون يصعدون سقف مطالبهم معتصمون حتي رحيل .. أوباما ” ..!!١

وبعدين ياريس مادام رحيلك إن بابليك ..ومفيش فيه فيلينجز ..والشعب كله عايزه ..يبقي سو ووااااات؟!!١

إنقذ مبارك مع الإعتذار لمصيلحي

نصيحة لعمر سليمان إضرب صاحبك لو هم كتيرررررر” ..!!١

مبارك لحبيب العادلي : منعت الحشيش يافالح آهو الشعب فاق ..!!١

رسالة من طلبة مصر للمتظاهرين بميدان التحرير : قصروا علشان إحنا اللي هندرس كل ده في التاريخ  ونحفظه

مبارك يصعد ليلقي عبد الناصر والسادات فيسألوه : ايه اللي جابك سم ولا منصة ..فيجيب فيسبوك

بلطجي لقناة العربية العيال بتوع التحرير بيرموا علينا قنابل بلوتوث

كوك زيرو .. يعني إيه كوك زيرو

يعني تمنع وزير من السفر.. تلاقيه بيتكلم من دبي .. رشيد محمد رشيد

يعني  إحنا نعمل ثورة.. والمساجين هم اللي يتحرروا

يعني البوليس ياخد أجازة نص السنة .. والطلبة ينزلوا يقفوا في اللجان

يعني تبقي واقف بتشرب بانجو في اللجنة الشعبية .. ويعدي بوكس البوليس إنت اللي تفتشه

تويتات

مصطلحات ما بعد الثورة : ١انت جامد تحرير ٢واحشني مظاهرات ٣بحبك اخر ٢٥ حاجة ٤انت فاكس كنتاكي ٧انت بيضة مسيلة للدموع ٨معاك مولوتوف(ولاعة)؟ ٩انا عامل دماغ مطاطية٥انت واد اجندة٦البت دي جامدة دبابة

من أفلام الثورة : جاءنا الرئيس التالي , حرامية ف لندن , الطريق إلى التحرير , شئ من المولوتوف , التحرير رايح جاي ، أبي فوق الدبابة ,عودة النت , الريس عمر سليمان , نحن لا نرمى المولوتوف , الاجندة لا تزال في جيبي ، تويتة هزت عرش مصر, مهمة في ميدان التحرير , جواسيس ف الفيس, التجربة التونسية , ليلة القبض ع العادلي

عاجل: تجميد ارصدة الراجل اللي ورا عمر سليمان!١

عاجل : بيان الجيش رقم 5 : إعلان طلائع الجيش بطلاً للدورى , واللى عنده كلمة يورينا نفسه

النظام سقط بعد ما شال خمس مواد من الدستوررررر

رسالة من زين العابدين الى حسنى مبارك : جيب معاك دراع بلاى ستيشن

خبر عاجل : الصعايدة ما زالوا يطالبون حسني مبارك بالتنحــي

لأول مرة فى حياتنا نحتفل بمصر من أمام القصر الجمهورى .. حرية .. حرية .. حرية

بيان هام وعاجل من رئاسة الجمهورية بعد قليلشكله تهنئة المولد النبوي الشريف

ومن أغاني الثورة مصر يا امه يا أجندة

رئيس وزاراء ايطاليا : لا جديد في مصر فقد صنع المصريون التاريخ كالعادة

هاينز فيشر رئيس النمسا : شعب مصر أعظم شعوب الارض ويستحق جائزة نوبل للسلام
رئيس وزراء بريطانيا: يجب أن ندرس الثورة المصرية في المدارس
ستولتنبرج رئيس وزراء النرويج : اليوم كلنا مصريين

 

القمة العربية القادمة ستكون قمة للرؤساء العرب الجدد .. للتعرف علي بعض

تويتات : لماذا تأخر مبارك في خطابه الأخير

 

#ReasonsMubarakIsLate clearing browsing history
He forgot to turn the Internet back on at Sharm Al-Sheik.#ReasonsMubarakIsLate
To #Mubarak : Yes You Can ! 😀
#reasonsmubarakislate. My fave: Changing Facebook relationship status to “It’s Complicated.”

 

Advertisements
This entry was posted in Uncategorized. Bookmark the permalink.

One Response to الشعب المصري حين يثور ويبدع.. هتافات ..وكوميديا ..!!١

  1. كان في هتاف برضه يوم جمعة الرحيل علي وزن سنة حلوة يا جميل
    كان بيقول 30 سنة يا عميل
    30 سنة يا عميل
    النهارده الرحيل

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s